الكرش مش بتاعي...هما اللي رموني عليه !!

من ايمتى اللي بكتب على البطاطا...؟؟
سبتمبر 2006 يعني 4 سنين...و لو لسة ضايل فيه ناس لاسعة كفاية إنها بتقرأ البطاطا من يومها فحيلاحظو إنو أغلب البوستس كانت عن تجاربي و خبراتي و اهاتي و الليلة دوب و مراسيل مراسيل في عالم الدايت...روجيم...لغاية ما الناس شككت بمصداقيتي و الاتهامات الباطلة لشخصي إنو تولدت بكرش و عندي نكران...!!
إسمحولي يا جماعة أحكي إنو من بين الأربع سنين ممكن أحكي إنو الأيام هادي ظبطت...أي نعم انا لسة ما وصلت و إنو ممكن أحسد حالي بعد البوست هادا بس علقليل بكون سجلت إنتصاري على البطاطا اللي صارت زي الوضع بغزة تمام...بتجيه ونتا عارف إنو حينسم بدنك !!
برضو مش موضوعنا...نرجع للدايت...بعد تلت شهور من أكل الزريعة و الرعي الجائر...نزلت ما يقارب 17 كيلو من أصل 30...هو أي نعم بنص الطريق...بس جميل إنو تشوف صار فيه فرق...و هون بحب أحكي كمان إنو بغزة الفرق بطل سمة ممكن تلاقيها...يعني كلو بالبتنجان...فش فرق بين أخضر و أصفر...فش فرق بين طبقة وسطى و فقيرة...و فش فرق بين جاهل و متعلم...و المصيبة إنو بطل فيه فرق بين منطق و عدمو...كلو بلعب بمنطقة السالب...كلو فارط..كلو معدوم..الكل مش لاقي شغل...و الكل فارغ !!

فاه...رح انعجق على الفرق اللي عملتو على حالي ( مش على حالي بالمنطلق هداك..يقرفكم) و رح أعمل بوستات و ستاتوهات على الفيس و التويتر و أبعت مسجات...إنو أبو الشريف ضعف...بس أكيد بحكي إنو لولا تشجيع كتير ناس ما كان صار هيك...فشكراً يا جماعة !!
بس المشكلة إنو لما المثل بحكي إنو التغيير الشامل يحدث من تغيير المتغيرات المرتبطة بفضاء العينة أو إشي زي هيك...بس لاحظت شوية أشياء جديدة بتصير...مثلا السجاير و اللي خيبة الواحد يحكي إنو الها علاقة بأي طريقة بالروجيم...عشان لأ ملهاش...كمان إشي الثقة بالنفس...مش كانو يحكو الجمال جمال الروح...طلع كمان الواحد بكسب نقط لما يشتغل على حالو ( أول على حالو ماشي...تاني مرة صار فيه شك)...الثقة بالنفس بتزيد و بتحس بنوع من السيطرة...و جد زي ما دايما بحكي...والله الكلام أرتب ونا بفكر فيه...كان منطقي...اللي طالع هون كلام فاضي...بس بما إنو هادا اللي صرت كاتبو مش محيه...و إصطفلو فيه...هادا ازا لسة فيه ناس بتعتب عند البطاطا !!

السبوت الأول ببين أبو الشريف أيام عصور البهمنة !!

السبوت التاني لسة فيه بهمة بس بنسبة أقل...

و يمسيكو بألف خير....