مساكم خير يا جماعة...

الواحد نسي المدخل على التدوين اللي كنت مدمنة...
الواحد بعد ما حكا عن إشي كبير اللي هوا الحرب و الدمار بطل قادر بصغر الصورة على قد الأشياء الصغيرة اللي كنا نحكي عنها و كانت تعطي معنى للتدوين...
كنت حكيت إنو الواحد رح يكمل عيشتو و مع المشاكل اليومية ينسى اللي صار و...ويكمل
فعلا هادا اللي صار و الكل كمل على طريقتو...في اللي إحترف الحرب و اللي صار فيها عشان يلم تبرعات و مساعدات و  ناس إحترفت إنو تطلع مع اجانب و  يلفلوهم بغزة يشوفو معالم الدمار و على هادي السيرة انا تسخمت و طلعت مع تنين من فنزويلا  الله لا يوريكو  إشي إشي...كانو وين فيه قلق يجروني معهم...طب انا مترجم يا جماعة مش جيمس بوند...و لما يتصلو فيا صحابي إنو دير بالك فيه خبط بالناحية هادي ونا تضرب فيوزاتي و اطلب سيارة و ما اللاقيهم الا بجمعو حجارة زكرى...ولكو بجبيلكو شوال حجار و اختارو منها...
عدت على خير و روحو و الصراحة الواحد بشتقلهم...بس و هو في بيتو...
رجعت الحياة على غزة بالتدريج و رجع الواحد يطلع و قدرنا شباب المؤسسة نعمل معرض على أنقاض مستشفى اليهود قصفوها و الصراحة كانت تجربة ممتازة رجعت شوية توازن للشباب إنو يقدرو يكملو على الخط اللي كان عندهم قبل الحرب...

الغريب الشعور اللي بيجي للواحد، على صعيد (قوية صعيد) الناس اللي حواليه، و إشي بثبت اللي حكيتو مع إنو انا كنت معارضو أساسا، كتير من الناس اللي وقفت معنا أيام الحرب، بعد الحرب بيوم إختفت و كأنو خلص بعد الحرب بطل فيه لازمة نعرف بعض، ممكن الواحد ياخدها من منطلق إنو الناس بتبين بوقت الشدة !!
رح احاول أضل أكت علبطاطا...إشتقت للبطاطا !!