أحزان شجر البطاطا - بل ما تصير 18 و يفووت الأوان

يعني Jerusalem و حمدان باشا لبسوني بTAG إنو اكتب 6 أشياء الواحد لازم يعرفها قبل ما يصير 18 بس بدي اكتب بلعربي عشان بيعطيني مساحة أكبر أتنورن فيها...و بما إنو من زمااان كنت 18 سنة فححاول إنو أتذكر إيش ممكن أنصح جيل الطلائع ( عللي الطلائع منتو نافعين !!) و ممكن أحكي و بدون ترتيب...

1- عمرك ما تأجل مشروع إنك تبدأ تصلي...مع إنو شكلها معادلة بسيطة إنو من وقت ما بدي ممكن أصير أصلي..بتكون غلطان...كل ما الواحد يكبر بتصير الشغلة أصعب...و الواحد بغرق أكتر بالأشياء اللي بتبعدو عن ربو !!

2- ما تتمسخر على اللي بسمع عبدالحليم و أم كلثوم و فيروز....حتلف حتلف و حترجع تسمعلهم...إلا اذا كنت من جماعة مصطفى كامل...وقتها لا حول ولا !!

3- نوع صحابك...أو معارفك بشكر دقيق...ما بتعرف امتى بتحتاج تسرق سيارة...أو تتعلم شطرنج !!

4- تقرأش مجلات الشباب الفارطة...عشان ما رح تعمل إشي غير إنك تحس بنقص !!

5- تعرف أكتر على أهلك...خصوصا لو كنت من أصحاب الطموح انك تسافر...فش أحلى من انك تعرفهم و انتا عاقل و بالغ حتى لو أبوك كان نكد (الحمدلله أبو محمد طلع قشطة)...إسمع نصائحهم..حتى لو إنك ما عملت فيها !!

6- انا مع عبد...أول قصة حب بتكون غالبا مقلب...مش بس هيك...عمرك ما تسمع نصائح صحابك بهادا الموضوع...اتقل عليها...صارحها...و خصوصا صاحب نصيحة ما حبكت تروح علحمام...بس تخلص حكي بتروح على كيفك...اللاوعي بيعطي اشارات شوحة جداً لما تكون لازم تروح على " وزارة الري ".

7- (هادي من عندي ) تردش على حد لما يلاقوك فاتح كارتون و منسجم و يحكولك الله يكبرك !!

هيك بكون خلصت التاغ حتى لو كان على كلام فاضي...

و لازم إنو أعمل تاغ لعينة عشوائية منتقاه بعناية...

ايمان – ملائط – ربى- أدوش كمان مرة !!