عارف انو اللي بحكيه لا بودي و لا بجيب...بس بحسو مريح إاللي و ضروري انتو تسمعوه...
اليوم التالت في غزة، و طبعا ممنوع انو نطلع برة البيت و أصلا فش مكان تروح عليه و يكون أمان...بدون كتير مقدمات هادي أحداث صارت خلال هادي الفترة...
زي ما بحكو خلصت الأماكن الأمنية في غزة اللي ممكن تنضرب من مخابرات لشرطة و حتى الدفاع المدني، منيح انو سيارات الإسعاف عاتقينها لهلأ...
مبارح كان يوم سيء جدل عشان خبطو الجامعة الإسلامية في غزة...الحمدلله انا تخرجت بس برضو بتحز بالنفس تشوف المكان اللي تعلمت فيه حتى لو كانت زكريات زفت بس برضو...الجامعة علقت لأجل غير مسمى زي ما سمعت...و ازا بتلاحظو انو بس بستعمل حرف الــ "ز" عشان التاني معلق !!
جميل انو تبدأ مشروع صغير انتا و أصداقئك و تفتح مكتب...لأ مش صحيح المكتب اللي فتحناه انا و صحابي على سبيل و لا قعدة البيت، انخبط البيت اللي قدامو فراحت كل الشبابيك اللي بالمكتب و يمكن حتى شاشات الكمبيوتر...و هادا على السمع عشان ما حد قادر يوصل هناك أصلاً...و نفس الإشي محل صاحبي اللي فتحو يبيع جوالات لولا إنو هو محلو تسوى بالأرض من وقتها انا بحاول أتصل فيه جوالو مسكر...الله يعينك با مان !
خبطت الجوامع انا مصدوم عليها...يعني الجوامع تنخبط...والله حرام بس أصلا احنا بنحكي مع ناس ما بتعرف الحرام...و على فكرة ازا كان اي جامع مخزن أسلحة فحرام على اللي حط الأسلحة هناك...
طوابير الخبز ما بتخلص، لجان الإغاثة اللي مش قادرة تعمل واجبها عشان ممكن تكون هدف، حتى الناس اللي بدها تساعد مش عارفة كيف، تجار قاعدين بيبيعو و بشتروا بدم أهل غزة...ايش كمان ؟
اه، اليوم كنت مصروع لحاول أحكي مع شب انقصف جنب دارو بالظبط و شكلي رنيت على رقم تاني...رد عللي رجال حس إنو حالة طارئة فقعد يطمني و يسأل ازا الكل بخير...كانت حركة جميلة بكل الطرق عشان بسيطة...لسة فيكي خير يا غزة !!