تلعبش بمناخيرك !!

الا لما يكون معك كلنكس...و ممكن اقول بعين قوية انو اثبتت الابحاث انو اللعب بالمناخير يعتبر من العوامل المثبطة لأي تواصل انساني أو حتى حيواني...خصوصا ادخال السبابة في "خرم" المناخير.

خليك بحالك...

حاول ما تتعلق بإشي أو بشخص، الناس بتروح و بتيجي...ما تتوقع حد يستناك، و لما اتمسح و اتضلك ماشي بحالك...بتختصر تعب انك تعلقت بحد !!

تعلم تقول لأ...

حسن النية بطل من سمات الزمن هادا، ممكن جدا تتفهم ال"نعم" على انو انتا انسان ضعيف و بسرعة ممكن تلاقي كل اللي بتعرفهم راكبين على ضهرك..و الغريب بالموضوع انو انتا بتتخذها من باب " مدام بقدر..ليش ما اساعد " ، فلا يا حبيبي تعلم تقول لأ...اولها صعب و كتير من الناس ما بتقدر تتحمل هادي الكلمة و بفضلو انو انك توصلها بطريقة تانية...

في كل مكان حاول تكون زي ما انتا...

مش اشي ممكن اخفيه...فيا كل العجب اللي ممكن تلاقيها بالبني ادمين...و مع هيك ممكن احكي انو عندي رصيد  ممتاز من الاصدقاء و الصديقات...عشان صادقوني زي ما انا...سافل و  رزل !!

ما تحاول تزور من نفسك...و تذكر انو الطبع بغلب التطبع...و كل اللي حكيتو انساه في حالة انك بمقابلة لوظيفة معينة !!

الخجل اشي طبيعي...

جد بحكي..ما تخجل من خجلك !!

اقتنع بنفسك زي ما انتا...طور نفسك يا ريت و على راسي...كره نفسك لأ

و هادا كمان بنطبق على شعرك وجهك طولك وزنك عمرك..و لما توصل للسلام الداخلي مع نفسك..رح تعيش بسعادة...و اللي ظبط معاه بالله يحكيلي كيف !

تلعبش بشعرك كتير...

ما اتطول شعرك كتير... ولا تحلق القصة هديك اللي بكون شعرك طويل من النص و تحلق جوانب راسك كلها...ممكن احكي انو باسم كل اللي بعرفهم ممكن تترجم هادي الحلقة بكلمة وحدة : بيئة !!!

تحكيش بالسياسة...

حتى لو كنت سكان فلسطين...انك تحكي بالسياسة بطل اشي انك تشوف نفسك فيه على غيرك...شعوري الداخلي اللي دايما بحكي بالسياسة و بحلل الوضع من جوانب ما بتنتهي أحزاب و مؤمرات و غيرو...بكون غلبا يا اهبل يا مخدوع، اللي ضايل من تاريخنا هو بس صفحات بكتاب تاريخ ماضي اندرسو لولدنا...اما اللي بصير هلأ ما تحكو فيه...ما تحللوه...انسوه..بركي برضو سقط سهوا من تاريخ بدنا نوصلو للي جاي من بعدنا.

ما تفكر بزياده !!

فكر بأي اشي بشكل معقول و بعدين اعمل اللي بيرتاحلو قلبك و عقلك أو عقلك و قلبك...التفكير الكتير بجيب اشي واحد...التردد

و بتمنى انك تستخدم النصيحة هادي لما بدك تتجوز !!!

خود أي فلم و ريح بالك...

لما بدك تشوف اشي...شوف اشي!!

ما بهم بطولة مين و لا اخراج المحروس مين و لا فيه مناظر ولا لأ...

ما رح تلاقي فلم يرضيك 100 %

ما تستخدم مصطلحات أجنبية لما تحكي...

حتى لو كنت خريج مدرسة إخص فخص...أو عشت نص عمرك بره...الاسلوب هادا رح يتاخد على انو  و بالتو و اللحظة على انك بتتعالى و انك بتتكبر على اللي حواليك او اقل اشي انك بتتأمرك و هادا الاشي بس بكون لولاد...ولا بلاش !!

مفيد جدا تتعرف على البلطجية !!

خصوصا لما تكون عايش في غزة...اعرف اشخاص معينين من كل حزب و من كل عيلة و ما بهم الصالح من الطالح منهم ..رح تلاقي النصيحة هادي مفيدة جدا في حالة تغير الحكومات و الاسهال السياسي اللي عايشينو ...و مع السافل انتا اسفل و اسفل...لأنو غير هيك رح يستوعبو الموضوع على انك هاموله ( من هامل) غالبا ما رح توافقو على هادي النصيحة..لكن هيك قواعد اللعبة حتى لو ما بتعرف تلعبها !!

لما بدك تشتري اشي...

زي الملابس على سبيل المثال...خود أول اشي يعجبك و بناسب امكانياتك...و لما يعجبك اشي تاني...اشتريه بعدين... اه و لما بدك تطلع تشتري مع بنات...اضمن انو تطلع مع بنت وحدة و الا رح تكون طلعتك عبارة عن جولات نعيمة الصغيرة في ارجاء السوق الواسع المتسع لشراء افضل مشبك غسيل...ريح مخك من الناحية هادي...كلام ثقة !!

ما تحاسب حالك بقسوة...

الكل بغلط و انتا مش منزل عشان ما تغلط...المهم قابلية هادا الغلط انو يتصلح..و حتى لو وصلت الأمور لهداك المنحنى الدرامي من الأحداث : اللي انكسر عمرو و ما يتصلح يا عتريس...اتذكر انواع الصمغ و التيب اللي مليانة بكل المكتبات !!!

سيب الكبار بالعمر يحكو...

حتى لو كان نظام  أبو سيدك كان يدلعني و يقولي يا كوكو ولا انو ال300  كيلو لحمة بزمناتهم كانو بشلن...او انو كنت من ابطال معركة الكرامة و استشهدت مرتين هناك...

ممكن تلاحظ انو الكبار بحبو دايما يحكو عن الماضي..يمكن عشان بتذكروه اكتر من الحاضر..او انهم ضحايا أسوأ انتقام ممكن يكون من الزمن !