يمسيكو بالخير...

الساعة يمكن 2 و شوي...

ممكن احكي انو الدنيا مش بس مولعة...كأنو الشباب قاعدين بطخوا في الخزانة اللي وراي..

كل شوي تششش...صوت شباك بتكسر...و لا صراخ... إبسر امتى دور شبابيكنا يعني اشي جميل، اه انا ما حكيتلكو القناصين على السطح..بس والله محترمين ما بطلقو الصواريخ الا عند الزنقة..!!

ايش؟ ليش ما تطلعو من العمارة ؟!

لا...ما بنفع...السيناريو هادا شغال بكل مكان بغزة...واحنا لسة بخيييير...صاحبي تلقيه نايم تحت التلاجة !

المهم نرجع للموضوع....مداد الوضع ماشي بالاتجاه هادا...مش بعيد يتوافق على ورقي بأي لحظة...مع انو الصراحة انا مش جاهز لسة...بس ياريت الأوضاع تفتح عيون الواحد و يرجع لربو !!

اه..لاحظت انو طلعت عن الموضوع كمان مرة....المهم النهفة المنيحو اني سالخ نسكافيه بلاك بدون سكر عشان اقعد ادرس...فواضح انو هايبر بزيادة...لدرجة الجندي اللي شفتو اليوم منبطح يمكن نص ساعة كاملة...طب ليش فش حد بطخ عليه..حتى فش طخ بالمرة...ونا بطلع من الشباك...شو مالو مطخوخ يعني..لأ..بس شكلو بتمرن او مجتهد بزيادة !!

ههههههههه طلعت عن الموضوع كمان مرة...صحيح بخبركو انو شفت أول اعدام قبل يومين...بالأفلام بخلوها تراجيديا اكتر...بس بالواقع كانت سريعة و سهلة !

خلص خلص....الموضوع يا جماعة انو بدي اكتب وصيتي ( يا حيبيبي با خميس !! )

مش ضروري اموت...بس من باب الاحتياط ( ساعة بحاول استعمل العنوان...هيو ظبط )

احم احم....

بسم الله الرحمن الرحيم

الى كل من يهمه الأمر...

هههههههههههههه....واضح انو حكيت كلشي فوق !!

طيب ديرو بالكو على حالكو....

حاولو تقربو أكتر لربنا...رح ترتاحو...و حياتكو حتصير اسهل

اللي بصير بغزة ما بمثل فلسطين...بس يمكن معظم غزة...بدكو تدعولهم بالهداية على راحتكو...انا بدعي ربنا يحرقهم..!!

احيانا بكون مسقع و بايخ و تقيل دم....و أكتر من مرة اغلط بناس كتيرة...أحيانا بتكون غفوات و أحيانا ما بكون الوضع بايدي..و احيانا بغلط بناس مهمين...حاولو تسامحوني.

و بختم بدعيات مصر القناة الأولى :

الراجل مش بكلمتو....بس برعايتو لأسرتو

و طول ما تدي ضهرك للترعة....عمر البلهرسيا لبجتت اهلك ما ترعى

و ممتلكاتي الأغلبية عندو فكرة كيف رح تتوزع !!

اه صحيح...اذا متت فتفتة ما حدا يلمني...خلوني...يمكن الأرض تستفيد مني...يعني مش مفيد لا دنيا و لا اخرة...مشكلة !!

و سلامو عليكو...انطرشت من الطخ...

بشوفكو بكرا...يا بعدو او بعدو او بعدو !!