فريد بفتح عينيه ببطئ...عشان يلاقي حالو نايم بسرير كبير و مريح و من بعيد بلاقي سنكوح على كرسي و وراه توتو و زيكو....

فريد : ايييش يا !!

سنكوح : بليز....انتا خليتني اعمل هيك !

فريد : ابليز يركبك..يا.....

توتو  : ( و بنيتو يكسر كمان عضام ) :  أحم....

سنكوح : توتو ..بس يا ولد !

فريد ( مستقوي ) : اه بس يا ولد يا هلس !

سنكوح : سيبونا على انفراد....

بطلع توتو  و زيكو  و بسكرو الباب من وراهم ......

سنكوح : شايف...هيهم طلعو....انا لحالي

فريد : أصلا انا ما كنت بدي انتفك...كتير

سنكوح : اسمع..جد....شو جايبك هون ؟

و حكى فريد لسنكوح قصتو من بعد ما عمل سنكوح عملتو الندلة !!

فريد : انتا شو صار معك...و وين شكحة و الولاد ؟!

سنكوح : اييييييه...تعيش انتا !

فريد : له له له شو صار ؟

سنكوح : هادي قصتي يا سيدي...هربنا انا و شكحة...و ركبنا هلشحن و اتفقنا مطرح ما يوقف نبدأ حياتنا الجديدة...و هي طمنتني انو بدها تعلمني شغل الحاويات و الفيران....و حظنا انو طول الشحن ووقف بحي بالاسكندرية....نزلنا و بدأنا حياتنا و البسس المصاروة و قصروا معنا...لغاية يوم و شحكة بشهرها التالت و هي راجعة من مطعم السمك...دعسها شحن 18 عجل...و مش بس هيك...رجع عليها ريفيرس كمان !!

فريد : يا حبيب الله !!!

سنكوح : اتدمرت حياتي...و حاولت ارفع قضايا بس المحاميين طلعوا بحجج فاشلة زي انو انا بسة !

فريد : لا ما معهم حق !

سنكوح : شايف ؟ ....نصحوني اروح احاول اعيش من جديد بالقاهرة....الحاويات ماشي حالها و الدنيا بتسيك...و رحت...كنت بدي أغير حياتي...و بمهاراتي قدرت اقنع بنت صغيرة تتبناني...و حظي انو ابوها كان منتج فني من العيار التقيل...زبطت حالي بدعاية و بعدين فلم وثائقي...و بعدين قدرت انو العب دور بسة بفلم ...بس كان طموحي اكبر....لعبة صغيرة قدرت أصير شريك !!

فريد ( بنفسو ) : ممم...بس بصير شريك بشركة انتاج....ونا بنضرب من توتو....طيب !

فريد : طب تمام كتير...

سنكوح : بس أخيرا لقيتك...حد أثق فيه...زي أيام زمان بالظبط !!

فريد : مدير أعمال بسه...تاني ؟!

سنكوح :  المرة هادي...ما رح اهرب منك !

معقول الدنيا بدها تبتسم تاني ؟ حطيت راسي على المخدة و رحت أحلم من جديد !!

و فجأة ضلمت الدنيا كأنو حدا حط كيس خيش على راسي...شو هادا...صوت توتو ؟

توتو : هو انتا فكرها سايبا...هع هع هع انا ائطعك

زيكو : القطة دي بتاعتنا و احنا اللي حنظبطتها....تيجي انتا تاخد العز....ده بعدك !

شوي و نفس الفلم....اترمي بره الفيلا..بعز دين المطر.... و المطر بنزل على وجهي و كأنو فقدت الوعي من جديد !!

أفتح عني بصعوبة....شو هاد ؟

وين انا ؟

سرسوب مي بنزل من السقف على وجهي....صوت واحد بغني انتا عمري !!

أبو سامر بتحمم من جديد ؟

مين أبو سامر ؟

وين أنا ؟

معقول ؟

بتحرك على سريري المهري...صوت ست من الغرفة التانية

إصحى يا نطعي...عليك مقابلة شغل.مع هادا شو اسمو...الاستاذ حمدان....و ما تنسى تجيب حفاضات لمختار !

اه...رح تشتغل محاسب و و تعمل قهوة و شاي و تمسح بعد ما انروح و تسكر المحل و تفتح المحل و شيال الخ الخ الخ....

بطلت اسمع ايش بحكي...

بطل مهم شو أشغل أصلا...

المهم اجيب حفاضات لمختار...

عشان بغزة...ما تحاول تحلم...رح تتبهدل...

عشان البسس حظهم أحسن منك

يمكن عشان...بهادا المكان انتا ما بتساوي بسة !