فعلا فش اشي بدوم....قبل اسبوعين بالتحديد كنت من أسعد الناس بالدنيا هادي....و فجأة كلشي إختفى!!
أحيانا الواحد بكون ضحية صراحتو...لما ناس أو بسس يفهموها حرفيا...مشكلة، سنكوح هرب مع شكحة و لفيت كل غزة و أنا بدور عليهم..و يا حبيبي لما عرف الأستاذ حمدان إنو البس بتاعو هج و شرد، طبيعي حملني المسئولية و وعدني إنو يخلي حياتي جهنم ...لغاية ما أرجع بسنكوح !!

ما كنت متوقع انو الناس تعمل ببعض هيك عشان بسة...فش حد قابل يوظفني بأي وظيفة و اذا حد رضي يومين لغاية ما يوصلو تلفون و يضطر انو يرفدني....و نفس الإشي بالسكن خلصت مدة الإيجار و فش حد يبيتني....بس صاحبي قدر انو يخليني لغاية ما قدرت أشرد على مصر..يمكن أقدر أبدأ حياة جديدة هناك !!

وصلت مصر...وبديت أدور على شغل عشان أقدر أعيش...و الله وفقني إني أكون صبي قهوجي بقهوة بأحد الأحياء الغير حية في القاهرة...اللي شهرين بشتغل و بيوم من الأيام ونا مهدود و واقف استنى الأوتوبيس عشان أروح علبيت، وقفت سيارة مرسيدس اجدع من اللي كانت عند الاستاذ حمدان، واضح انو أنا المطلوب...فتح شباك السيارة الوراني بوقار....نعم ؟ مين ؟ معقول ؟ سنكوح ؟

نط من الشباك و حضنتو كأنو صديق قديم قديم زمان ما شفتو...ونا بحضنو تذكرت اللي صار فيه من وراه...بشديت عليه و هو حس بالمقلب...

فريد : والله لأنتف وبرك يا كلب يا ابن الكلاب

سنكوح : ولك أح أح أح...اسمعني بس...أح أح

فريد : تسمع الرعد بودانك يلبعيد..موت موت!!

سنكوح : يا توتو يا زيكو يا توتو

و ظهر من السيارة عبارة عن حيطين بشريين أعتقد انهم الحارسين الشخصيين لسنكوح و فلتوه من قبضتي و بدو يتسلو بشخصي الكريم...بكسات شلاليت كفوف...لغاية ما سنكوح صحي و صرخ عليهم....ولكو بس انتو حتقتلوه يا كلاب بس !!

ونا مكوع على الأرض سمعت سنكوح بحكيلهم يحطوني بلسيارة و فقدت الوعي من بعدها !