( في الفصل السابق تعرفنا على فريد خريج ادارة الأعمال و بحثة عن الأمل و العمل في قطاع غزة...و مقابلته مع الأستاذ حمدان المليونير الذي يعرض عليه وظيفة لا يمكن تجاهلها...مدير أعمل بسة )

فش قدامي الا انو اقبل الوظيفة...راتب زي هادا ما بياخدو الدكاترة، المهم رحت أول يوم عمل على بيت الأستاذ حمدان و أفادني البواب إنو  سنكوح بيه صحي مش رايق فأخدوا السواق يلفلفو بالبلد شوي !!

فما كان مني الا انو أقعد بغرفة الجلوس استنى سنكوح الزفت...صور سنكوح مع الأستاذ حمدان...جوائز ..شهادات..واااااال...واصل السنكوح هادا !!

شرف سنكوح بيه....أهلا و سهلا...بدخل البس و بتطلع عللي بزاوية 45 و يضل ماشي و بقوللي وراي علمكتب !!

أوكي...ماشي يا دنيا...بمشي وراه لغاية ما يوصل على العلبة اللي فيها مخدة...و بقعد عليها و بكل برود بحكيلي اليوم بدي سردين مع شوية كلاماري...و بدو يلعب بكورة الصوف الكبيرة الخضرا مش الزرقا الخضرا...ونا زي المش فاهم بسجل و بتأمر على الخدم إنو كل اشي يكون في مكانو بالوقت المناسب !!

بعد فترة من الوقت علاقتي تحسنت كتير من سنكوح و الصراحة بعد ما تتعرف عليه...بتغير رأيك انو كل بسس الذوات بتكون ماخدا بحالها مقلب...و نهايتو الشغلانة هادي ماشي حالها و الواحد بقدر يفتح فيها علاقات منيحة...يعني لما وصل للاستاذ حمدان انو  جماعة من الجماعات بدهم يخطفوا سنكوح و يطلبو فدية...سفرنا على فرنسا تحت حماية...و لما هديت الأمور رجعنا على غزة !!

في يوم من الأيام وحنا – أنا و سنكوح – قاعدين قعدة صفا...صارحني بأشياء غريبة...

سنكوح : فريد في إشي غريب بصير ونا مش فاهمو...

فريد : اه خير...شو فيه

سنكوح : بتعرف إم وائل اللي سكنين قدامنا...

فريد : اه بعرفها شو مالها ؟

سنكوح : أم...أمم...إحم...أمممم

فريد : ااااااااااه....يا هلس...بس انتا بس ابن ذوات و هي بسة حارة..يعني ايش جاب لجاب !!

سنكوح : الأمور هادي ما فيها طبقية....انا لما أشوفها بحس انو كل سردين الدنيا مالوش طعم دونها

فريد : العاااااب...طيب حكيتلها ؟

سنكوح : أكيد شكحة موافقة تتزوجني و كلو ممتاز بس حمدان ما رح يقبل...ايش رأيك ؟

فريد : ما بعرف...بس انتا واثق فش مشاكل...اعمل اللي في بالك...

سنكوح : بتحكي جد....يعني اعمل اللي في بالي...واللي يصير يصير ؟

فريد : الأشياء اللي زي هيك ما بتصير دايما

سنكوح و هو سرحان...فعلا !

و بعد شوي إجا تلفون فطلعت أرد عليه...و لما رجعت كان سنكوح إختفى....دورت عليه فالبيت و الشارع و كل مكان...و الصدمة لما عرفت انو شكحة بسة إم وائل إختفت كمان !!

يخرب بيتو...عملها الكلب...قصدي البس !