أحزان شجر البطاطا - سهرة مع البكتيريا

تخيلو...اليوم أول مرة من شهور ما أطلع من باب البيت...زي ما تحكو شوي مفلوز و ماكل هوا...حتى وصلني انو مبارح كانت ضاربة الحرارة و بهلوس إشي عن الآلة !!

انا متأكد انو مش آلة الحلاقة...بس شكلو هيك بصير لما تتفرج على LOST و يكون عندك حرارة...فليوم كنت قاعد بالبيت نقاهة و من الآخر..كنت زهقان و كان عندي النية انو أوزع الزهق على كل اللي فلبيت...بس لسوء الحظ مش متذكر انو صحيت اليوم الا بعد التنتين...

من بين أفلام و الكميات العملاقة من الكلينكس و شوية شغل علخفيف...و بيني و بيكم بشتغل هلأ على موقع لمطعم برام الله...يعني مطعم غالبا عمري ما تكون الي الفرصة انو أكون فيه...و الصراحة مغلبني الموقع هادا...فبرضو من باب الندالة المعهودة كواحد ساكن بغزة...بفكر أكتب على الموقع DESIGNED BY : Potato Trees Productions و ما أظن حد يقدر يعارض...شغلي و بحقلي انو احط عليه (هع هع هع اسم الشركة )

ببقى أحط اللنك بعد ما أخلصو...نرجع للبكتيريا و المرض...من بعض امتيازات المريض انو القدرة على انو يتمسكن...مثلا شربت شاي اليوم ليوم الشاي حتلى انو وصلت انو بشري شاي زهق مش اكتر...ماماااااااا...بدي شاي...ماااامااااا....امتى الغدا...لسة مطول ؟؟ طب بدي شاي !!

و بديش احكي عن السيطرة الميدانية على التلفزيون...و انو الكمبيوتر بغرفتي...فكنت ماخد دور البياخة جامد اليوم....مثلا أختي الصغيرة قاعدة....ونا زي القضى المستعجل...حطيلي شاكيرا....بس انا ما بدي اسمع شاكيرا....أكيد ما بدك تسمعي شاكيرا....آه....طيب بدي انام...يالله بره !!!

و أكيد بختلف الموضوع مع الوالد....ايش يابا...بدكاش تسمع شاكيرا ؟

برد علي بنظرة مفصلية تستحوز على الارتداد الاندحاري لكينونتي المتواضعة

اوكي....انا هيني برة...ناديني اذا بدك اياني!!