أحزان شجر البطاطا - لحكمت و لبيت حانون

مساكم قشطة...

كنت بدي اكتب بالموضوع هادا كذا مرة بس دايما كنت اتراجع عشان الصراحة مش عارف ايش بدي اكتب...

هادا يا جماعة من أكم من يوم، كان عندي تصوير في بيت حانون في شمال غزة, و كان صديقي حكمت هو اللي بدو ياخدني عشان هو ساكن هناك...

كنا اتفقنا انو نلاقي بعض عند الباصات اللي رايحة على بيت حانون...و كان الكلام هادي بعد يوم دراسي من العيار التقيل فكنت شايف الديك أرنب ( قول تاني كده ؟!! ) و ميت جوع...فوقفت اشتريت سندويش جبنة بس هيك عشان يدفي المعدة عبين ما اروح على البيت...فاخدتو و لقيت حكمت و رحنا عند الباصات و انا طلعنا على الباص ونا سعيد بسلخ بالسندويش و فجأة...و مش عارف كأنها لحظة من موكا موكا ولا ماروكو لما يوقف الزمن و تنزل نقطة العرق العملاقة !!

كل اللي فلباص بطلع عللي و نا ماسك السندويش....حكمت ؟ هاظ معك ؟؟؟

وواضح انو لو ما كنت مع حكمت كان انفرمت او صارت الكاميرا جزء من وجهي...فقعت و نسفت الباقي من السندويش علسريع...وكانت الرحلة مش طويلة بس كانت صعبة لإضراري انو اسمع الحنتور و بحبك يا حمار...هع هع هع تخيلو بس لو نطيت و حكيت ايش رأيكو نسمع محمود العسيلي !!

وصلنا لبيت حانون عشان تبدى ضربات الواقع تشتغل لما حكمت حكالي انو المنطقة هادي ضحية معارك قبلية بين عيلتين...و العيل الصغيرة ملطشة لقوات الوطن بدون ذكر حركات عشان كلو زي بعض !!

يعني الباص اللي احنا راكبينو عشان ملك احدى العيل مرينا بدون ما يرجعونا القوات...مش بعيد تصير الشغلة علهويات...مين عارف !!

بدينا نلف على الأماكن اللي بدنا نصورها...و طبيعي كانت مآسي من بيوت ما فيها سطح لبيوت ما فيها حمام !!

الموضوع كان كتير صعب بس ما تعدى طريقة الحياة الصعبة...الجو كان حلو و بيت حانون فيها هدوء ( لو كان الوضع عدل ) و كمية من الخضار كنت بتمنى اشوفها في غزة....بيت حانون ما فيها مواصلات داخلية فكانت مشاويرنا مشي...الحمدلله اعطتني الفرصو انو احكي اكتر مع حكمت و اتعرف قديش الحياة ممكن تكون غريبة...يحكيلي عن صحابو و الاحلام البسيطة و كيف نصهم استشهد و غيرو...لسة مقتنع انو حكمت خسارة في مكان زي بيت حانون !!

وحنا بنمشي وصلنا للحدود او ( السلك ) و كان واضح انك تشوف الفرق العملاق ما بين جوا و بره...اشي بقهر تشوف الخضار و النخل و النظام و تشوف البيوت المهدمة و الفوضى...ايش معنا ؟!