أحزان شجر البطاطا - تفكير... إبداعي لأبداعك !!

تاني بوست ما الو أي لازمة....و بكتبو بس عشان بدي اكتب ....و بس !!

كالعادة، الشباب الطيبة على السطح، و الصراحة كان نفسي أحكي عن ظهور صديقي سلوم الأول على خشبة المسرح، و مش بس هيك ظهورين...الأول وقف زي الأسد يشعر عن فلسطين..بصوتو الجهوري..و الدور التاني...كان عامل دور صوت واحد ميت..أبو عرب...و لولا العتب كان نفسي انزل على الyou tube بس اقنعني انو صعب الواحد ياخد تحويلة يتعالج برة...حبيبي يا سلوم !!

نرجع للموضوع...كانو الشباب عاملين حلقة عصف ذهني ( موديل غزاوي...راس شيشة و حبشتكات و ورقة و قلم فاضي ) عن ايش ممكن يعملو سيناريو لمسرحية صغيرة تنعرض بمناسبة عيد الأم !!

السيناريوهات هي هي....فش تغيير...حكاية اللي بدو يطلع امو بسلة و الولد بحكي رجع السلة عشان لما تخرف اطلعك فيها...و الإبن الصايع اللي ما بسمع كلام امو و بياكل هوا...

و أكيد غلطو و طلبو رأيي...

سيناريو رقم 1 : ايش معنى دايما الولد هو الصايع و الإم هي اللي بتنصح...خلينا نغيير شوي و نعكس...بس قال ايش ايش الهدف من هادا....ما بفهمو بالعقد التراجيدية !!

سيناريو رقم 2 : طيب...الإم دايما بتكافح على ماكنة الخياطة...خلينا نعمل شوية إثارة بإن الإم بتاجر بالسلاح و كيف و هي قد حالها بتكون حنونة مع ولادها....برضو نفس العذر التافه بتاعهم !!

سيناريو رقم 3 : طيب خليني اشغل شوية ستيفت سبلبرج شغل Science fiction ...قصة سعيدة بين طفل و إمو و بيضل مع بعض عايشين بسعادة لسنين طويلة...بس الولد ختير و الإم لسة زي ما هي...بعدين بكتشف انو إمو ماتت من زمان و اللي كان سعيد معاه مجرد روبوت....بس كمان عذر غبي انو من وين بدنا نجيب امكانيات لهيك إشي...

سيناريو رقم 4 : رأفت الهجان...بكون الإبن جسوس..و الحلو انو إمو جسوسة للطرف التاني...و بتصير الحبكة انو هل تختار تصفي ابنها الوحيد عشان الوطن..ولا تتخلى عن أكل عيشها عشان ابنها ؟!

لحد هيك كانت كبايات الشاي مستعدة انو تترمي عللي...بس الحلو انهم اعطوني الشيشة عشان أضل ساكت بس على مين...بكرا بشوفو لما السيناريوهات هادي تتباع شو بصير...خسارة فيهم...واضح ان الشباب ما بدهم يشتغلو !!