أحزان شجر البطاطا : Dietetic schizophrenia

قبل ما تخافو و تقولو الولد صار معدي و تفتحو الويكيبيديا اتدورو و حالة....بحب اطمنكم انو هادا مرض غير معدي بصيبني انا لحالي ( انتو مش فاهمين و كتير منكم سكر الصفحة أصلاً )

فلاش باك...شهر من اليوم :

نتيجة الزهق المفرط اللي بنعيشو و نتيجة الكسل و الخمول و قعدة الكمبيوتر اللي ممكن تصفي على 7 ساعات متواصلة يوميا فانو هادا كلو بسبب التجحيش و نعني بالتجحيش انو وزنك يصير اكتر من سعر البترول و انو تصير تتعب من انك تتنفس أصلا الى غيرها من المظاهر التي لا تفرح عدو ولا صديق...

فلواحد بقرر قرارات هبلة زي انو يعمل دايت (تاني ؟) بس المرة هادي و لصعوبة الموقف بكون تحت إشراف طبي (من زمان شكين انو بدي دكاترة صح ؟) و نصحوني بالدكتور فلان الفلاني اللي من الآخر خسس نص الشعب...و غريب أديش الناس بتخجل من الدكاترة...

يعني اللي بروح عند دكتور نفسي بصير مجنون و لازم يحجرو عليه

و إحم اللي بروح عند دكتور تغذية بصير...اححم احححم...طنط !!!

يا سلام....و ليش الواحد يخجل...فيا إشي غلط و بدي أصلحو...التلفزيون ولا التلاجة أحسن مني يعني ؟!

المهم مش الموضوع...أعطاني نظام ولا أنظمة غوانتانامو الله يحرق اللي عملو ...و الصراحة إشي عسل...باشهر صرت نازل سبعة كيلو...عظيمة يا مصر !!

بس من منطلق انو الطاقة لا تفنى ولكن تتحول...فانو النظام الصحي اللي بعملو أثر سلبيا على كينونتي مما أنتج - الانفصام الغذائي- و هو مرض استحدثتو بدل منا قاعد و أعراضو...انك بتتحول لكائن ثنائي الشخصية يعني أكل طول عمرك بتكره أهلو بصير فجأة....إشي خرافة...

آآآآآآه ايش عاملين على الغدا

مش انتا عامل روجيم...

آه...بس بدي اعرف ايش عاملين عشان اعرف اتحسر

فول أخضر...

جيد جيد أصلا بكره الفول الأخضر...يعني طخوني ولا آكلو...أصلا أصلا...هممم والله ريحتو حلوة...بدي أدوق!!

و المظهر التاني للمرض...الجريمة و العقاب :

الواحد بكون ماشي بالشارع بمر من قدام أبو السعيد...(مع انو بحط السلطة بايدو اللي كانت بمكان مجهول الهوية) بس برضو بترف على بالك...

شريف المنيح : ولك مجنون...مخلل و فلافل مقلية....ابعد ابعد

شريف الشرير : سيبك منو...اليوم استراحة !!

شريف : مش مبارح اخدت استراحة...؟؟

شريف الشرير : لا مبارح اكلت ونتا مش ماخد بالك....لا تحسب !

شريف المنيح : يعني بتدفع مصاري و مغلب حالك عشان تخرب الدنيا...والله عيب !