أحزان شجر البطاطا : حوار مع النفس

مسا الخير...

المفروض يوم الخميس في فترة الامتحانات يكون احلى اشي ممكن يصدف معك...

خودولكو هالفلم,

فلاش باك:

أبو عمري : اه ولا..شفت سلوم

أنا : اه ما رح نقدر نروح على السطح, عندو مشوار

أبو عمري : طيب..عندي اكم من مشوار لأهلي بخلص و برن عليك بنروح اي مكان

أنا : اوعك تتأخر حموت على نفس شيشة !

............

الوالدة : شريييييييييييييييييف..روح جيب اختك من عند خالتك

أنا : بديش ( شوف الوقاحة يا أخي )

الوالدة : يعني برضيك أبوك يلبس و يروح يجيبها يعني ؟

أنا : لا اله الا الله...حاضر يا ستي..بس مستعجل بدي اشيش

الوالدة : هما خطوتين و بترجع

أنا : ماشي

صوت الوالد من بعيد : ما تنسى تجيب سجاير

الوالدة : اه والله و كيس بزر كمان

أنا : يا سلام !!

الوالدة : يعني برضيك أبوك يلبس و يروح يجيبهم يعني ؟

أنا : لا ما برضيني..حاضر اللي بدكو اياه

الوالدة : الله يرضى عليك

أنا : بيصير خير !!

..........................................

بروح عند خالتو...عشان الاقي حالي صرت بيبي سيتر..قاعدين بتفرجو على مش عارف ايش..اللي ما بتعاد الا كل قرن و نيف ( مين يابا ؟ )

و بيصير حوار داخلي :

شريف ( الشيطاني ) : بالله سهرة بلا بطيخ انتا جاي تخدها و تروح

شريف ( المنيح ) : يعني برضيك..تزعل اختك حبيبتك عشان شيشة

أنا : مممممم ليش لأ ؟

شريف ( الشيطاني ) : زلمتي أبو الشريف..ما بنخاف عليك !!

شريف ( المنيح ) : جد انك نطعي...هسه ( ما بعرف من وين جاب اللهجة الاردنية ) بدك تزعل اختك و ترد على شيطانك...و هيهم بترجو فيك اتضل, اخص عليك اخص..ما فيك خير لأهلك

أنا : يعني حبكت يوم الخميس ؟ حاضر يا سيدي هيني رح اضل بيبي سيتر عشان خاطرك....ما رح اشيش عشان اللحظات الجميلة مع العائلة.

شريف ( الشيطاني ) : يا هلس...هيك بتبيعني.

أنا : مشيها المرة هادي

شريف ( الشيطاني ) : ما بدي...الا نعمل اشي !

أنا : ايش في بالك ؟؟

شريف ( الشيطاني ) : بدي اتعشى

أنا : عادي..دار خالتي داري ...أحلى سندويش

شريف ( الشيطاني ) : بدي كولا كمان !!

أنا : والله ما اظن فيه...بمشي مكة كولا ؟

شريف ( الشيطاني ) : مكة كولا ايش...بلا منها، شفت عصير راني ( الحبيبات جايي !! )

أنا و شريف ( الكويس ) : اخص يع...لا بعرضك

شريف ( الشيطاني ) : معكم حق...شر بس مش للدجة هادي

بنقعد نتجاذب أطراف الحديث انا و العائلة...لفترة قصيرة

شريف ( الشيطاني ) : زهقت..بدي اعمل اشي

أنا : اه احكي...

شريف ( الشيطاني ) : شفت علبة بسكوت....

شريف ( المنيح ) : مقاطعا : ولك استحي عاد..سندويس و....

أنا : استنى يا زلمة..خليه يكمل حكي...ايوة معك

شريف ( الشيطاني ) : اه..وين كنت...انتا بتحب البسكوت هادا, و بالمرة بنروح بنقوم اللي قاعد على الكمبيوتر وبنعمل اشي مفيد, بننزل على التشات و لا بنكتب بوست !!

أنا : حلو الكلام !!

شريف ( المنيح ) : كتير هيك..انا مش جاي !!

أنا و شريف ( الشيطاني ) : هههههههههه ياهبل !!

........................................

و يمكن من نص ساعة و نا باكل بعلبة البسكوت اللي مش راضية تخلص...

و بتيجي اختي ( اللي كنت بستنى تخلص ) بكل رصانة تحكيلي...شريف تأخر الوقت..عيب ما بدك تروح

أنا : نعم ؟؟؟؟ منا بستنى بحضرتك !

أختي : أنا اصلا بدي ابات هون !!

أنا : نععععععععععععععععععععععععععععم ؟؟

ما بعرف بس مش سامع صوت شريف ( الشيطاني ) و حاسس انو شريف ( المنيح ) شمتان فيا عالاخر....ما بعرف ليش ما بحبني الأخ هادا ؟!!