ليش تبدأ تجربة محكوم عليها بالفشل ؟  "سلوم"

جرى العرف و التقاليد انو اليوم الأول من العيد تعطيه لأهلك و اليومين التانيين عندك مطلق الحرية انك تصيع و تقضيهم مع صحابك، و الصراحة تقال انو التوقعات كانت ضئيلة جدا هادا العيد انو ننعم ببعض الوقت الحلو انو اشي نتذكرو...بس ههههههه صدقوني هادا اشي رح نتذكرو...

البداية :  بعد لفة يائسة على كل مكان نضيف ممكن نقعد فيه عشان نحس ولو مجاملة انو احنا بشر، كل مكان مسكر بوجهنا تحت الشعار البراق " للعائلات فقط " و هون بدي أفش خلقي شوي : بكون كذاب اذا حكيت انو بلوم المطاعم و الاوتيلات و و و  انو يمنعو الشباب من الدخول, عشان في عينات لا يمكن مشاهدتها الا في العيد و هون بتطلع العنصرية بأسفل أنواعها حيث انو هادي العينات هي ما يعرف بسكان اخر الدنيا أو النور و للعلم فإنهم بنزلو على غزة ( أو المدينة ) زي ما بحكو بجمعات تتألف اكتر من 7 و الهدف منها هو تعكير صفو الجماعات المدنية الغلبانة زي حالاتنا !!

نرجع للموضوع....كل مكان مسكر بوجهنا، واحنا مش احسن من غيرنا بنلف على امل ايجاد هادا المكان، بيجي اتصال من مصدر خاص جدا انو في أوتيل فاتح أبوابو للشباب و الأهم إنو مش مليان ، و احنا ما كذبنا خبر اركب بالتكسي و انطلق، ويبدو انو مصدرنا الخاص جدا كان عندو كريديت بالموبايل و هو حاسس بروح العيد، فلما وصلنا كان المكان مليان لدرجة انك ما بتقدر تحط رباط كندرتك, و ينتهي فينا الأمر...مصفوفين برة من جديد و هون صار حوار لا بأس فيه :

سلوم : يلعن أبو اليهود يعني هادا عيد هادا..والله حرام

بعبوزة : والله لما أشوفو...عللي الطلاق بدي &^%%^$&^%&^%&^%#$#$%#%&....الخ

أبو الشريف : يا شباب روقو...يلعن أبو كل الأماكل النضيفة بنروح نقعد بالقهوة تعتنا و السلام..هي الدنيا شوي برد بس ماشي الحال..ما اظن الأمور ممكن تسوء أكتر من هيك..!!

و كأنها السما بتاعت الكرتون...تتكدس الغيوم بثواني و بووووووووووووم رعد و برق و تششششششششششسسسسسسس ( مطر )

شكرا !!

ناخد التكسي و نطلع في اتجاه القهوة..بلكي دخلو الكراسي و قعدنا جوا, بس وحنا بالطريق لاقينا مطعم عن نفسي ما بحبو بس مع اصرار بعبوزة و سلوم ما كان النا انا و مرادكوف الا انو نحكي اوكي!!

مع ما دفعنا 20 شيكل تذاكر ( مش اشي بس و زعلت عليهم ) قعدنا و ما ان بدت الفرقة تعزف حتى اكتشفت بعض الحقائق المهمة :

1-      السدة اللي عنا اكبر من المطعم

2-      المكان مليان بالعينات ( راجع المقدمة ) اكتر من علبة السردين

3-      عمليا انا قاعد جوا السماعة

4-      الفحم طافي و الشاي بارد و بدون سكر او حتى معلقة تدوب فيها السكر المش موجود اصلا !!

مش عارف...حسيت انو الحوار هادا دار براس كل الشباب..مش عارف !!

بعد انتهاء العقوبة، لسة الساعة 9 والله بدري، سلوم تطلع براسو فكرة انو بدو يتصور للعيد, فش مشاكل انا لاقيتها فرصة ممتازة اروح عالبيت القريب من المصور عشان البس جاكيت و ازور مكتب العميد ( انتا و فهمك ) !!

لحقت الشباب علمصور عشان اللاقيهم طلعو بفكرة انو نتصور كلنا الأربعة , من باب تحصيل حاصل كنت قاعد قدام الكاميرا مع انو اموت بالبلهرسيا اهون عللي، أصور اوكي..اتصور اخخخخخخخخ !!